Urdu News - Times of Pakistan Your one step source of News from Pakistan and around the world

Video/Movies	E-Cards	Cricket	Tech. Watch	Matrimonial	Free SMS	Jokes	Funny Pics.

اسٹاک مارکیٹ،تیسرے روز بھی مندی کا تسلسل برقرار، 73 پوائنٹس کی کمی

کراچی(اسٹاف رپورٹر)بدھ کو تیسرے دن بھی اسٹاک مارکیٹ میں مندی کا تسلسل برقرار رہا جس کے باعث انڈکس میں مزید 73 پوائنٹس کی کمی ہوئی اور 15500 کی حد بھی گرگئی۔ ماسوائے انرجی سیکٹر کے دیگر بیشتر حصص میں فروخت کا دباوٴ نمایاں رہا۔ ان میں فرٹیلائزر اور سیمنٹ سرفہرست تھے۔ لاہور میں 11 پوائنٹس کم ہوئے۔ کاروباری حلقوں کے مطابق مخصوص حصص میں خریداری کا رجحان برقرار ہے اور ان حصص میں زیادہ تر مندی چل رہی ہے جو گزشتہ دنوں کے دوران خریداری میں نمایاں تھے۔ اس لئے ان میں منافع کے حصول کے لئے کریکشن ہو رہی ہے۔ البتہ بینکنگ کے بعض حصص اور انرجی میں صورتحال اس کے برعکس ہے جس کی وجہ تیل کی قیمت کا 120 ڈالر فی بیرل تک پہنچنا ہے جس میں خاص طور پر پرانے اسٹاکس سے منافع بخشی میں اضافہ یقینی ہے۔ بدھ کو مجموعی طور پر 363 حصص سرگرم رہے جن میں سے 109 میں اضافہ اور 212 میں کمی ہوئی۔کے ایس ای 100 انڈکس 73.38 پوائنٹس کم ہو کر 15470.14 پر ختم ہوا۔ کاروبار کا حجم 277 ملین حصص کے سودوں پر مشتمل تھا۔ پنجاب میں 18.5 ملین، حب پاور 17 ملین، او جی ڈی سی 14.4 ملین، پی او ایل 14.3 ملین، اینگرو 13.3 ملین اور جے ایس بینک میں 13.1 ملین حصص کا کاروبار نمایاں رہا۔ پنجاب بینک 80 پیسے بڑھ کر 61.30، حب پاور 65 پیسے بڑھ کر 35.05، او جی ڈی سی 1.40 روپے بڑھ کر 139.45 ، پی او ایل 8.15 روپے بڑھ کر 414.60 اور اٹک ریفائنری 12.50 روپے بڑھ کر 263 روپے پر ختم ہوئے۔ اینگرو 14.35 روپے کم ہو کر 353.85، جے ایس بینک ایک روپے کم ہو کر 22،ایزگارڈ 1.65 روپے کم ہو کر 89.95، نشاط ملز 4.65 روپے کم ہو کر 127، ڈی جی خان 2.60 روپے کم ہو کر 109.80، جے ایس انوسٹمنٹ 3.90 روپے کم ہو کر 122.60، ستارہ پرآکسائیڈ 1.75 روپے کم ہو کر 76.80، عارف حبیب 3 روپے کم ہو کر 181.50، فوجی قاسم 50 روپے کم ہو کر 40.50 اور پیس لمیٹڈ 1.10 روپے کم ہو کر36.25 روپے پر ختم ہوئے۔ سب سے زیادہ اضافہ اے کے ڈی کیپٹل میں ہوا جو 42.50 روپے بڑھ کر 885.55 اور ماری گیس 17.95 روپے بڑھ کر 376.95 روپے پر آگئے جبکہ رفحان میظ میں سب سے زیادہ کمی ہوئی جو 145 روپے کم ہو کر 27.55 اور سیمنس 75 روپے کم ہو کر 1494 روپے پر آگئے۔لاہور کا انڈکس 11.30 پوائنٹس کم ہو کر 4760.48 پر ختم ہوا۔ کاروبار کا حجم 19 ملین حصص کے سودوں تک رہا۔